TACLOBAN CITY – Siyam nga Philippine Airports an kumarawat hin “star ratings” tikang ha official aviation guide, usa nga Air Travel Intelligence Company nga nakabase ha United Kingdom, ini an gin-anunsyo han Civil Aviation Authority Of The Philippines (CAAP).
Gin-anunsyo yana nga bulan an resulta han 2017-2018 OAG On-Time Performance (OTP) star ratings for airlines and airports.
Para yana nga tuig, walo nga Philippine Airports an kumarawat hin 1-star rating: Ninoy Aquino International Airport (NAIA), Mactan-Cebu International Airport, ngan an provincial airports ha Iloilo, Bacolod, Cagayan De Oro City, Davao, Puerto Princesa ngan Tacloban City. An Clark International Airport in nakakuha hin 2-star rating.
Sumala han CAAP, an duha nga criteria, an airlines ngan airports in dapat mayada minimum nga 600 operations ha kada bulan (minimum of 2.5 million departed seats), ngan an oag in kinahanglan makakarawat hin flight status information ha diri maubos hin 80 percent han scheduled flights ha sakob han usa katuig.
Samtang, dida han 2016-2017, nakakuha na hin star rating an Tacloban Airport, ika-duha na ini kabeses yana nga pagpasidungog.
