Davao City – Naguol ug nasakitan ang usa ka DXDC listener kinsa nanag-iya og mga baboy human kini nakadungog nga gikinahanglang pamatyon ang ilang mga binuhi bisan kini og himsog pa.
Kini human nagpositibo sa African Swine Fever (ASF) ang gipailawom sa test nga 1000 ka mga patay’ng baboy sa pito ka mga barangay sa Davao Occidental.
Atol sa interbyu kang Romelita Sombilon, 53 anyos nga taga-Brgy. Lanao, Don Marcelino, Davao Occidental, wala kini nasayod kung unsa ang iyang buhaton sanglit ang pagbuhi og baboy maoy pinakadali nga panginabuhian sa ilang lugar.
“Naguol jud ko ug nasakitan na nakadungog ko nga pamatyon ang among mga baboy nga himsog man kaayo ug tambok pa gyud.. Halos tanan mao na among panginabuhian dinhia kay dali kaayo makatabang sa among mga problema,” saysay niini.
Hinuon dugang ni Sombilon nga karong adlawa gikatakdang itapok ang mga nanag-iya og baboy sa ilang barangay uban ang mga opisyal apan malaumon gihapon kini nga matubag ang ilang daghang mga pangutana.
Gisulayan sa DXDC og paabot sa maong mulo sa Department of Agriculture ingon man klarohon apan sa pagkakaron nagpadayon pa ang panagpulong niini uban ang mga milangkob sa Regional Animal Disease Task Force.
Una nang gipanganlan ni Don Marcelino Mayor Michael Maruya ang mga barangay sa Lindasan, North Lamidan, South Lamidan, Calian, Mabuhay, Lawa, Nueva Villa, ug Baluntayan nag gikan ang mga baboy.
RadyoMaN Jason Amisola
