LA CASTELLANA, NEGROS OCCIDENTAL – Duha ka trabahante ang ginlabo kag patay gid matapos na-impito ang suspek nga masami nila ginasunlog kag gina-bully kagab-I sa banwa sang La Castellana, Negros Occidental.
Nakilala ang mga biktima nga sanday Jomar Pacionela, 25 anyos, soltero kag residente sang Sitio Tikoy-tikoy, brgy. Cabacungan, La Castellana kag ang isa pa nga nakilala lang kay Alias Danny.
Ang suspek naman ginkilala kay Jaime Laurente, 38 anyos, tumandok sang San Jose, Dumalag, Capiz.
Ang insidente natabo may mg alas 10:45 kagab-i sa slod sang Villaluz Ricemill sa Purok 2, Brgy. Cabacungan, La Castellana.
Suno sa suspek nga si Laurente sa interview sang Straight to the Point program kaina sang aga, lima sila ang naga-inom inom upod ang biktima sa sulod sang arosera kag ini siya ang liwat naman nga ginsunlog sang mga biktima.
Pahayag sang suspek nga pirme ini siya gina-bully kag ginasunlog nanday Jomar kag Alyas Danny kon diin masami nila ginahambalan ang suspek nga: “ pangayaw ka lang diri, wala sang may ma-apin sa imo.”
Gani kagab-i sang ini siya ang liwat nga gin-bully sang mga biktima, nagdulom ang iya pamensaron suno sa suspek gani nagkuha ini sang “tabas” nga gina gamit sa pagtapas sang tubo, nagalaba sang 28 pulgadas kag ginpanglabo ang mga biktima.
Si Jomar ang nakaangkon sang patal nga pilas sa ulo kag pila ka bahin sang lawas samtang si Danny naman ang halos na-utod ang liog.
Matapos ang krimen, nagsungka ang suspek sa iya amo nga si Kagawad Ivan Villaluz nga amo naman ang nagdala sa iya sa pulis./dyHB BACOLOD
