Bacolod City – Nadali pa ang iya nga cellphone dala pa ang iya cash. Amu ini ang kapalaran sang isa ka 47 anyos nga lalaki nga ginahinago lang pangalan kag taga-Navotas matapos ini ang nagkuha sang isa ka ‘chicks’ kag iya gindala sa Las Rocas Hotel nga nahamtang sa dalan Gatuslao.
Suno sa tagreklamo, sang ara na sila sa sulod sang hotel, wala pa sila naka-umpisa apang naglisensya anay ang ‘chicks’ nga sikat sa pangalan nga ‘Christy’ nga magbakal sang pampainit, nga amu naman ang ‘pula nga kabayo’ ukon Red Horse.
Mga isa ka oras ang hulat sang pobre nga Manila Boy apang wala gid nakabalik si Christy tubtob sa ulihi nga iya natukiban nga wala na ang iya nga Samsung J1 cellphone nga nagabalor sang P5,000 pesos lakip man ang iya gina-ipit ipit nga cash nga nagalab-ot naman sa P900 pesos.
Wala na sang may mahimo ang lalaki kondi ipadangat nalang sa pulis ang insedente para makapangayo man sang bulig kon paano makapauli sa Metro Manila.
Madumduman nga nagin modus na sang mga ‘chicks’ sa Bacolod ang pagpanunto sa mga lalaki nga ila ginatransaksyon kon may nakit-an sila nga tsansa kaangay sang sitwasyon nga ara sa sulod sang comfort room (CR) ang lalaki, natulugan ukon nadulaan sang animo bangod sa kakapoy.
