Davao City – Andam na ang Tagum City nga itukod sa ilang dakbayan ang international airport ugaling kini ang madesisyunan sa gobyerno.
Gibutyag ni Arturo B. Manigo Jr., coordinator sa Davao Integrated Development Program (DIDP) – Tagum City nga aduna nay nakatagana nga area alang sa himuong international airport diin sa Tagum City partikular na sa Brgy. Madaum nga nag-unang nakitang lokasyon nga sulod sa criteria sa ipatukod nga tugpaghanan.
Subay sa inisyal nga evaluation sa Civil Aviation Authority of the Philippines (CAAP), Department of Transportation (DOTr) ug National Economic and Development Authority (NEDA) pabor sa Tagum City ang mga criteria nga gilakipan sa “outside 50km radius” gikan sa airport nga kasamtangang naga operate, lapad nga luna, wind direction ug cloud formation.
Matud pa ni Manigo nga anaa sa 1,000-1,200 hectares ang kalapad sa maong luna nga nahimutang sa nahisgutang barangay.
Sa nahimong diskusyon sa NEDA, aduna na usay gipahigayon nga pre-feasibility study ang DOTr kalabot sa nahisgutan nga proyekto.
RadyoMaN Kirbz Manzon
