Giklaro ni Engineer Armen Cuenca sa City Local Environment and Natural Resources kon Clenro ning syudad, nga sirado ang tanang sementeryo mapubliko o pribado man ning dakbayan sa Oktubre 29 hangtud Nobyembre 4 ning tuiga.
Kini tungod sa kamanduan sa Inter Agency Task Force kon IATF.
Matud ni Engineer Cuenca nga tungod niini ang pagduaw sa sementeryo ang himoon sa dili pa ang nasangpit nga petsa o pagkahuman sa maong mga adlaw.
Gipahibalo usab ni Engineer Cuenca ang mga palisiya ilabi na niadtong mobisita sa City Public Cemetery kon Bolonsiri, aron nga malikayan ang mga pagtapok-tapok nga maoy matudlong hinungdan sa local transmission sa covid19.
Gitugutan lamang nga makasulod sa tanang sementeryo ning syudad ma-publiko o ma-pribado, ang katong adunay Barangay Exit Pass kon BEP.
Matud ni Engineer Cuenca nga kung walay dala nga BEP dili usab kini makasulod sa menteryo.
Dugang pa niini nga maximum lang sa lima ka tao ang makasulod sa matag lubnganan ug dili puwede nga magtapok.
Gawas niini gibawal usab ang overnight tungod kay gitugutan lamang ang pagsulod sa mga tawo sa menteryo, gikan sa alas singko sa buntag hangtud sa alas singko sa hapon.
Apan giklaro ni Engineer Cuenca nga usa ka oras lamang ang gitagana nga higayon sa matag indibidwal sulod sa menteryo.
Ang patakaran sa Public Cemetery kon Bolonsiri ang pagasugdan sa Oktobre 19 hangtud sa Nobyembre 19 ning tuiga.
Tumong sa gihimong palisiya sa pagsulod sa katawhan sa mga menteryo ning syudad, mao ang ikaayo alang sa tanan ug dili alang sa gobyerno.
Gipasabot ni CLENRO Head Engineer Armen Cuenca nga wala sa gobyerno ang sulbad sa pagsumpo sa virus kondili anaa sa katawhan.
Dugang pa sa Clenro nga bisan unsaon sa pagbuhat sa pamaagi sa gobyerno kung ang katawhan mao na mismo ang mosupak magresulta kini sa pagka-angin sa kadaghanan.
