Pasakaan na sang kaso ang mga suspek nga nakuhaan sang mga wild animals sa entrapment operation sa Brgy. Alijis, ciudad sang Bacolod, las-3:30 sang hapon, Hunyo 5, 2020.
Sa gintingob nga pwersa sang Criminal Investigation and Dectection Group (CIDG) Bacolod kag DENR-CENRO Bago City, naaresto ang mga suspek nga sanday Ramil Cabale, 45-anyos, isa ka mangunguma kag Ruzzel Taghoy, 27, kag lunsay residente sang Purok 6, Brgy. Minoyan, Murcia, kag Dexter Belleza, 36, nga residente naman sang Purok 3, Brgy. Minoyan Murcia.
Nakuha sa posisyon sang mga suspek ang 25 ka live pit viper; isa ka patay nga palm civet cat; 13 ka angle head lizard nga buhi kag duha ka patay; 36 ka Orphnaecus perfumy; 66 ka Orphnaecus Philippinus, 59 ka assorted centipedes (Arboreal Green, Tiger, Red and Yellow Leg); 17 ka sailfin lizard; 2 ka patay nga cave gecko; 70 ka flame leg millipede kag 35 ka black millipede.
Narekober man ang 100 peso bill nga marked money kag P149,700 nga boodle money. Kaso nga paglapas sa RA 9147 ukon “Wildlife Resources Conservation and Protection Act.” ang ipasaka batok sa mga suspek.
[image: image.png]
