BACOLOD CITY – Ginreklamo sang isa ka 31 anyos nga dalaga ang isa ka taxi driver matapos ini siya ang ginhagad nga magpakig sex mag alas 8:30 kagab-i sa dalanon sang Brgy. 9 diri sa ciudad.
Nagakudog-kudog pa nga nagpadulong sa Police Station 1 ang dalaga nga nakilala lang kay Alyas Inday, pumuluyo sang Juan St., Brgy. 10, Bacolod City agud ireklamo ang isa ka taxi driver.
Suno sa tagreklamo, nagatindog siya sa higad sang dalan kag nagahulat sang jeep nga masakyan sang nagpundo sa iya atubang ang taxi, ginpapanaug sang driver ang bintana kag ginsenyasan ini siya nga kon luyag sini magpakig sex sa iya.
Gilayon nga nagpalayo ang babayi kag nagpangayo bulig sa isa ka security guard nga yara lang sa area apang ginsundan pa ini gihapon sang taxi. Iya pa ginhambal sa security guard nga pasahero niya ang dalaga.
Apang sang ulihi naglakat naman lamang ang driver sa diin ini nga hitabo ang nagdulot sa babayi sang discomfort kag kakulba rasun nga iya ginpablotter.
Indi niya man kilala ang taxi driver kag una yadto nga tion nga sya ginhagad nga mag ‘joy ride’.
