Pinaiimbestigahan ni Senator Loren Legarda ang sinasabing naging network dito sa Pilipinas ng yumaong convicted na American sex offender at human trafficker na si Jeffrey Epstein.
Layon ng Senate Resolution 300 na inihain ni Legarda na repasuhin kung sapat na ang batas at regulasyon sa bansa laban sa normalization, pagtatago at pagpapalaganap ng sexual abuses.
Ipinapanawagan din sa resolusyon ang pagpapaimbestiga sa Epstein network ng Department of Justice, National Bureau of Investigation, Department of Information and Communications Technology, Department of Social Welfare and Development at Inter-Agency Council Against Trafficking.
Hinihingan din ang Department of Foreign Affairs (DFA) sa Estados Unidos at iba pang bansa ng mga authenticated na dokumento at records na maaring makatulong sa imbestigasyon dito.
Giit ni Legarda, kailangan itong imbestigahan upang matunton ang mga tao o digital services dito sa bansa na nasangkot sa umano’y mga krimen ni Epstein na promotion, facilitation at pagsasagawa ng human trafficking at sexual exploitation activities.
