Bukidnon – All set na Technical Education and Skills Development Authority (TESDA) – Provincial Office of Bukidnon alang sa duha ka adlaw nga National TVET Enrolment ug Jobs Bridging Day alang sa mga gustong makabansay-bansay sa technical and vocational education and training (TVET) ug sa mga graduates niini.
Sa interview sa RMN Malaybalay ngadto kang Abdulwahid Madum, ang senior TESD Specialist gibutyag niini nga ang mao nga kalihukan sa TESDA uban sa pakigtinabangay sa Bukidnon TVET Institution Association (BUKTIA) nga himoon ugmang adlawa, Pebrero 27 ug 28 ning tuiga sa Valencia City Hall Covered Court.
Alayon niini gi-aghat sa buhatan ang mga out-of school youth nga pahimuslan ang scholarship nga programa nga gitanyag sa TESDA alang sa tuig 2018.
Nasayran nga mag-imbita usab ang TESDA sa mga kaabag nga mga negosyante, employers ug industriya aron mu-apil sa jobs fair.
Dungan niini gi-aghat ni Madum, ang mga kwalipikadong aplikante ilabina ang mga nakabaton na ug NC I, II, ug III nga muapil sa mao nga jobs fair.
Gitandog usab sa TESDA-Bukidnon ang publiko nga gustong makabansay-bansay sa mga gitanyag nga kursong vocational sa TESDA nga mu-apil ug magpalista sa himoon nga 2 ka adlaw nga National TVET Enrolment aron makabaton sa igo nga suplay sa mga maayong technicians, technologists ug trabahante ang nasud.
