CALATRAVA – (2nd Update) Madamo sang nagapamangkot kon anu gid ang madalom nga motibo kon ngaa nga ginpatay nga may kaugot ni John Mark Melebo, 21 anyos sang Sitio Upper Pala-pala, Barangay Marcelo ang tatlo sini ka mga manghod?
Ari ang Investigative Reports sang dyHB Investigative Reports Division.
Tatlo ka adlaw antis natabo ang insedente, nakit-an na si John Mark nga ginabaid ang plamingko nga iya gingamit sa pagpatay sa iya mga manghod. Sang ginpamangkot ini sang iya tiyo nga si Norberto, isa lang ang sabat ni John Mark, gamiton nya lang ang plamingko para sa pagkihad sang mga mga panakot.
Pasado las 11 sang udto, Hunyo 9 sang ginbiyaan ni Mauricio Melevo, stepfather ni John Mark ang ila balay para magpaligo sa suba. Nabilin sa ila balay ang iya mga manak nga sanday Jhonrenz, 14; Jenny Rose, 9; Alejandro Jr., 5; kag bata sini nga si Gregor, 1 year old. Nagakatulog sa duyan ang lapsag nga si Gregor samtang sa katre naman Alejandro. Ara sa babaw sang balay ara si Jenny Rose kag naga-arrange sang ila bayo bangod siya ang babaye sa mag-utod. Sa guwa ara naman si Jhonrenz nagapanglagis sang lukay para himuon nga silhig-bukog.
Mga las 12:30 sang nag-abot si John Mark gikan sa kampo, nagareklamo ngaa nga wala pa palanyagahon. Ginhunos sini ang iya plamingko. Una nakit-an ni John Mark si Jhonrenz, gin-uyatan sa ulo kag ginlampos sa duta. Nagasyagit ini kag nagatulalagay ang luha sa kahadlok sa iya magulang, apang wala ini sang may mahimo bangod sila lang sa amu nga tion, malayo ang mga kaingod. Ginduslak ni John Mark si Jhonrenz una sa iya nga liog, kag para masiguro nga patay na, iya gingubrab ang liog sini.
Amu man sina ang ginhimo nya sa nagakatulog niya nga manghod nga si Alejandro Jr. samtang ginkuha nya sa duyan ang lapsag nga si Gregor, ginbutang sa batiis ni Alejandro Jr. kag gingutrab man ang liog.
Sa kahadlok, dumalagan halin sa ila nga balay si Jenny Rose, nagpanago ini sa kakugunan. Nakit-an nya pa nga ginlabayan ini sang iya magulang nga si John Mark, bitbit ang plamingko nga puno sang dugo. Nagakudog naman ini sa kahadlok apang ginpunggan niya ang iya paghibi, sa pagpati nga kon makit-an siya sang iya magulang, amu man ang kapalaran niya sa iya mga utod.
Nagbalahuba na ang hitabo, tubtob nga nakalab-ot man ini sa stepfather nga si Mauricio nga halin sa suba. Nagahilibion ang amay sa sitwasyon sang iya mga manak kag bata.
Tuyo pa nga magpalagyo ni John Mark apang posibli pagkagab-i, nagbalik ini. Las 6:30 kaina sang aga, nakit-an ini malapit sa iya payag nga nagapanago sa buho nga pahigda sa diin gintabubunan niya ang iya lawas sang dahon sang saging. Nakit-an siya bangod kay kitaon ang iya tiil.
Sang 2016 lang nag-upod si Mauricio kag Perla. Si Mauricio magulang sang bana ni Perla nga si Alejandro Sr., 45 anyos. Nagbulagay si Alejandro Sr. kag Perla apang ginbugayan sang apat ka mga kabataan nga sanday John Mark, Jhonrenz, Jenny Rose kag Alejandro Jr. Sa pagbulagay sang mag-asawa sang 2016, ginsalo ini sang magulang ni Alejandro Sr. nga si Mauricio kag nagbata sila ni Perla kay Gregor. Si Perla ang nagpadulong sa Manila kag nagtrabaho bilang kabulig sang balay.
Anu gid bala ang ginalantaw nga motibo sang pagpamatay ni John Mark sa iya mga manghod?
Pila sa mga anggulo nga nausisa sang DYHB IRD amu ang pag-init sang ulo ni John Mark nga kapoy na ini gikan sa kampo, wala pa nakahimos panyaga ang iya mga manghod nga nabilin.
Si John Mark ang kilala sa ila lugar nga tilimplahon ang batasan, madasig manginit kag may nervous breakdown. Rasun naman nga ginhimuan ini sang separado nga payag pila lang kadupa ang antad halin sa ila balay. Dira na sya gatulog separado sa iya mga manghod nga ginatatap sang iya stepfather.
Isa man nga ginalantaw nga motibo amu ang kainit sini bangod wala nakapaenrol sa Grade 12 sa rason nga may mga wala nahitso nga subjects kag may mga wala nabayran sa eskwelahan. Naga-ayo ini sa iya iloy paagi sa tawag sa cellphone nga buligan siya nga makaeskwela sa sini nga school year, apang wala sang may mahimo ang Nanay bangod nga magluwas nga layuanay, may mga dapat pa ini hitsuhon sa eskwelahan.
Ang isa man ka natingalahan sang dyHb IRD ang ginkurit sini sa iya wala nga butkon gamit ang blade nga nagasiling, “JOHN MARK OMEGA” kag ang tinaga nga “FUTURES IN AND OUT”. Sa pagpangusisa nagaguwa nga nagsulod si John Mark sa isa ka kulto. Sa iya pag-upod dala ang saad paagi sa nakapagkit sa bitbit nga libritas sa diin, kinahanglan niya nga magpatay sang dose tanan ka tawo. Kon mahimo nya ini, maagom siya sang gahom nga indi madutlan sang bala kag bisan binangon kon labuon. Pagpati ni John Mark nga kon himuon niya ang pagpatay sa iya mga manghod, may gahom ini nga sa iya lang makit-an.
Apang sa interview kay John Mark, wala siya nakitaan sang kasubo ukon paghinulsol manlang. May pahayag siya kon ngaa nga nahimo niya ang kremin, ina bangod kay ginsugo siya ni Satanas.
Si John Mark, ang mahilig sa sports nga chess. Suno sa iya mga abyan, masami man ini nagapangayaw sa iban nga lugar para ipakita ang iya abilidad sa chess.
Sa pagpauli sang iloy nga si Perla gikan sa Manila dako nga trahedya sa kabuhi ang iya ginsug-alaw. Patay ang iya tatlo ka mga kabataan, priso pa ang iya kamagulangan. Solo nalang nga si Jenny Rose ang nabilin sa iya. /Jen Canoy photo
