ILOILO CITY – Ginhangkat ni Mrs. Maria Victoria ‘Marivic’ Mabilog si President Rodrigo Duterte nga bisitahan ang ila puluy-an sa ti-on sang pagtambong sini sa Dinagyang 2018.
Suno kay Marivic, Tiayon ni anay Mayor Jed Patrick Mabilog, ti-on na agud makita ni Duterte ang kamatuuran sa sitwasyon sang ila balay nga gintawag sang presidente nga mansion kag dako pa sa malacañang.
Ini ang panghangkat ni Marivic matapos liwat naman nga ginmitlang ni Duterte ang anay alkalde kag gintawag naman nga drug dealer.
Tuhay ini sa una nga akusasyon ni Duterte nga drug protektor ang anay alkalde.
Ginpost ni Marivic ini nga mga mensahe sa iya facebook account kasunod sang liwat nga pagmitlang ni Duterte sa iya bana nga anay alkalde.
Ara karon sa abroad ang mag-asawa nga Mabilog bangud sa kahangawa sa ila kabuhi kasunod sang mga pamahog nga ila nabaton gikan mismo sa presidente sang tuyo nga i-assign diri si C/Insp. Jovie Espenido nga amo ang nagpanguna sa oparasyon sa pamilya Parojinog nga lunsay nagkalamatay.
Si Espenido man ang chief of police sang ginpatay sa raid si Albuera Mayor Rolando Espinosa.
Ini mga mga opisyal lunsay ara sa drugs watchlist ni Duterte.
