Gi-question sa National Confederation of Transport Union kon NCTU ang timing sa Public Utility Vehicle Modernization Program sa Department of Transportation kon DOTr.
Matud ni Joel Gabatan, Vice President sa NCTU sa Northern Mindanao nga wala pa sa insaktong panahon ang Public Transport Modernization kay wala pa maka-andam ang mga Transport Operators sa ilang capital aron mopalit o mangita sa Modern Vehicle sa kantidad nga kapin 3 million pesos per unit.
Gipasabot ni Gabatan nga ang NCTU, dili supak sa Public Transport Modernization ni President Duterte.
Apan matud ni Gabatan nga ang dili mayo sa maong programa kay dili pa magahom sa mga Operators ang pagpalit sa bag-ong sakyanan bisan pa sa gitanyag sa gobyerno nga 80 thousand pesos subsidy kada operator.
Gusto sa transport group nga sa 2022 pa ipatuman ang modernization program sa DOTr.
Kini aron maka-andam ang mga operators sa ilang Capital ug pagto-on sa ilang pagpa-membro sa mga transport cooperative.
“Wala pa kami experience sa Cooperative, maong mangayo kami sa gobyerno sa 5 years transition period pero tulo ra katuig ang gihatag kutob ra sa 2020” matud ni Gabatan.
Matud ni Alan Aminoden Guro, Regional Director sa Land Transportation Franchising and Regulatory Board kon LTFRB nga insakto pa ang panahon nga ilang ipatuman sa DOTr ang transport modernization program.
Gibutyag ni Guro nga sa 2020 wala nay Public Utility Jeep nga mamasahero sa kalsada.
“Ipatimbang nalang kanang karaan nga mga Jeep kay dili na man kana i-rehistro sa LTO ug dili napud kana hatagan ug franchise sa LTFRB” matud ni Guro.
Matud usab ni LTFRB Chairman Martin Delgra nga ang gobyerno naghatag panugot sa mga Steel manufacturers nga magtukod sa melting Plant aron ilang tonawon ang kaaraan nga mga PUJ ug himoon nga bag-ong puthaw.
Apan matud ni Delgra nga ang mga operators sa karaang mga PUJ bayran gihapon sa gobyerno o sa melting plant sa oras nga ilang ipatimbang ang ilang kaarang mga Jeep.
