Nasikop sa personahe sa PS6 Puerto ang usa ka tindero sa milk tea mga alas syete ang takna kagabie. Kini atol sa gilusad nga anti-illegal drug buy bust operation sa Zone 2, Brgy. Bugo ning syudad.
Naila ang suspek nga 30 anyos nga si Dave Villegas, alyas mata, ulitawo nga dunay anak. Gikabutyag sa otoridad nga duha ka semana nilang gipaubos sa surveillance ang suspek dihang kumpirmado na ang iyang iligal nga aktibidades dayon gikasa ang maong operasyon.
Nasayrang napalitan sa usa pakite nga dunay sulod sa gituhoang shabu balor 500 pesos ang suspek kung diin maoy hinungdan sa iyang pagkasikop.
Samtang atol sa pagkapkap sa suspek, nakuha gikan sa bulsa ni-ini ang laing duha pa ka pakite sa gituhoang shabu nga pinutos og karton. Ang tanang nakumpiskang shabu, gibana-banang motimbang sa 1 ka gramo nga dunay street value halos 7 mil pesos ug lakip nga nakuha kaniya ang 500 pesos nga buy bust money.
Temporaryong naka detained karon sa PS6 mini custodial cell ang maong dinakpan samtang gihikay na ang kasong pagsupak sa Republic Act 9165 batok kaniya.
Kasama mo sa PS6 Puerto, RadyoMaN Andy Coco, DXCC Tatak RMN!
