Ginbawian sang kabuhi ang isa ka tiyo matapos ginluthang sang iya hinablos nga barangay kagawad sang barangay Dungon, Concepcion, Iloilo pasado alas 4 kaina sang hapon.
Ginpahayag ni Police Chief Inspector Abner Jordan, hepe sang Concepcion PNP nga ginkilala ang biktima nga si Ricardo Brillantes, 57 anyos , isa ka mangingisda samtang ang suspek amo ang hinablos sini nga si kagawad Rodan Demate.
Suno kay Jordan nga base sa ila imbestigasyon, natabu ang insidente samtang nagahusayay ang duha sa ila kuha nga isda sang nagmuno ang suspek parte sa palaabuton nga barangay eleksyon.
Ginpahayag nga ginpamangkot sini ang iya tiyo kon bala botohon siya sini kon magpadalagan siya sa eleksyon.
Subong man, wala nagsabat ang biktima kag sa wala sang anuman nga rason, nagkuha sang armas luthang ang suspek kag hinali na lamang nga ginluthang ang iya tiyo nga naigo sa dughan.
Gindala pa sa ospital ang biktima apang makaligad ang pila ka oras, ginbawian ini sang kabuhi samtang ang suspek madasig nga nagpalagyo sakay sa iya pumpboat kag nagapabilin nga at large tubtub subong.
Ginapanawagan na lamang ni PCI Jordan ang suspek nga magsurrender na lang sa mga pulis kag atubangon ang iya ginhimo nga krimen.
