TALISAY CITY, NEGROS OCCIDENTAL – Hugot nga ginapanginwala sang duha ka nadakpan nga ginatudlo suspek sa natabo nga pagpanghold-up kahapon sa Brgy. Dos Hermanas, Talisay City.
Suno sa mga suspek nga sanday Rowel Evangelista, 30 anyos, pumuluyo sang Brgy. Dos Hermanas kag Jomel Abatayo, 30 anyos, residente sang Had. Sian, Talisay City nga indi sila ang may kahimuan sa paghold-up sa biktima nga si Emilie Honrada Yanson (kapareho lang ang pangalan sa prominente nga Yanson), 44 anyos ang edad pumuluyo sang Brgy. Bata, Bacolod City kag sekretarya sang isa ka hacienda.
Sa imbestigasyon sang Talisay City Police Station, may mga la 1:30 kahapon sang hapon, ginaalegar nga ginhold-up ang biktima sang amo nga duha ka mga suspek sa isa ka area sang Dos Hermanas.
Nakuha sa biktima ang kapin P90 mil pesos nga para kuntani sa payroll sang mga trabahante ang hacienda.
Bangud sini, gilayon nga nagpatigayon sang hot pursuit ang pulis kag didto na intercept sanday Evangelista kag Abatayo.
Siling sang duha nga mismo ang biktima nga si Yanson na ang nagsiling nga indi sila ang suspek sang nag-atubangay ang mga ini sa malapit sa barangay hall sang Dos Hermanas.
Pahayag sang mga suspek nga may yara man sila sang kaugalingon nga suspek sa amo nga hold-up kon diin posible nga kaupdanan man lamang sang biktima sa hacienda ang may kahimuan sini.
Nagapanawagan naman ang duha kay Yanson nga klaruhon ang ila kahilabtanan sa Talisay PNP para mahilway sa kremin. /dyHB BACOLOD
