Patay nang nakit-an sulod sa abandonadong septic tank ang usa ka tomboy nga lima ka adlaw nang nawala.
Matud ni Police Captain Jack Llanita ang hepe sa Macabalan Police Station nga giila kini sa mga kaparyentihan ang biktimang si Rachelle Manahan, 32 anyos nga taga Block 4, Barangay Puntod human makita ang shoulder bag niini lakip na ang sinina sa biktima.
Gibutyag ni Police Captain Llanita nga mga alas syete kaganihang buntag sa dihang nakita nila ang mga gamit ni Manahan sa Tamparong Compound sa Barangay Puntod ning syudad ug natingala sila sa baho nga naggikan sa septic tank ug didto nila nakita ang patayng lawas sa biktima.
Si Manahan nagtrabaho isip cashier sa Jetti gasoline station sa Agora, Barangay Lapasan ug gilayon kining gauli human sa iyang duty mga alas onse sa gabie sakay sa iyang bisekleta.
July 22 sa dihang ulahi kining nakita sa iyang paryente pasulod sa trabaho ug wala na nakauli sa ilang balay busa gipangita kini sa iyang pamilya.
Dali usab nga nasikop ang suspek sa maong pagpatay nga si Daniel Bagobaldo, 41 anyos, usa ka sikad driver nga taga Balingasag, Misamis Oriental ug sub-care taker sa yuta sa pamilyang Tamparong.
Nakuhaan usab sa CCTV sa Corrales extension ang nahitabong pagpatay kang Manahan kung asa gisundan kini sa suspek ayha gihapak sa kahoy ug gisulod sa sako ug gikarga gamit ang bisiklita.
Sa karon, detinado na ang suspek sa Macabalan Police Station samtang giandam sa pamilya sa biktima ang kasong ipasaka batok kang Bagobaldo.
