Nasikop sa gipahigayong drug buy-bust entrapment operation sa mga kapulisan ang gikonsiderang Top 1 target sa Philippine National Police (PNP) ug Philippine Drug Enforcement Agency (PDEA) sa pagpayuhot sa illegal nga droga sa Bukidnon kagahapong adlawa takna alas 4 sa hapon didto sa purok-5, Brgy. San Martin, Malaybalay City, Bukidnon.
Giila kining suspetsado nga si Roem Doydora Y Binuong, alias Wemwem, 34 anyos, ulitawo ug mulopyo sa naasoy nga lugar ang kinsa napalitan og 0.09 gramo nga drogang shabu nga mukantidad og php500.00.
Nakompiska usab ang laing mga pakete sa gituohang shabu nga mitimbang og 0.8 gramos ug gibana-banang mukantidad og php5,440.00 uban sa usa ka php500.00 bill.
Sa pagkakaron, gidala na sa Malaybalay City Police Station ang suspetsado lakip ang mga nakompiskang ebidensya ug layong ipagaturn-over sa PNP Provincial Crime Laboratory Office alang sa tokmang disposasyon.
