Wala sang tupong nga kalipay ang nabatyagan ni Mary Clarence Gepes Madero sang Hibao-an, Pavia matapos mahibaluan mismo nga siya ang topnotcher sa Licensure examination for teachers-Elementary Level.
Sa interview sang RMN Iloilo, ginpahayag ni Madero nga wala niya mapunggan nga magsinggitan kag magtumbo-tumbo sang makita nga number 1 siya sa listahan sang mga nakapasar.
Ginpahayag sini nga sa iya pagkuha sang LET, handum lamang niya nga makapasar kag wala siya nagalaum nga makasulod sa Top apang daku gid ang iya kalipay kon makasulod siya sa top 10.
Nahibaluan nga sa 80,509 ka nagkuha sang LET-Elementary Level naglab-ot lamang 21,198 ang nakapasar kon sa diin nagpanguna diri si Madero, Education Graduate sang West Visayas State University sang Marso 2017.
