Davao City- Moduso og resolusyon ang Sangguniang Panglungsod (SP) Committee on Transport and Communications kalabot sa planong pagpabyahe sa mga fast crafts dinhi sa syudad.
Sa interbyu sa DXDC RMN Davao kang Committee chair Councilor Conrado Baluran, nasayran nga kini usa sa mga pamaaging gi-rekomendar sa usaka grupo sa mga Chinese entrepreneurs agi’g tubag sa prayoridad sa syudad paghatag og remedyo sa problema sa trapiko dinhi sa Davao.
“Naa pa ‘ta karon sa hisgotanan, then after that, siguro sa second week of February, makahimo na ta’g Committee Hearing kay aron naay options ang mga tawo kung unsa (ang) ilahang gustong sakyan, kay naa man ‘tay High Priority Bus System,” segun ni Baluran.
Planong i-montar ang terminal sa fast craft sa Davao Fish Port Complex sa Daliao, Toril ug Sta. Ana Wharf.
“Nindot siya nga ideya kay ang travel time is 35 minutes lang from Daliao to Sta. Ana Wharf ug anaa sa 40-50 ka mga pasahero ang pwedeng musakay,” dugang sa konsehal.
Napulo ka mga fast crafts ang inisyal gilaraw nga i-operationalize kun tugtang molawig sa kadagatanan. Ang income niini didto mopadulong sa panudlanan sa dakbayan, pagpatino ni Baluran.
RadyoMaN Aimee Guinita
