General Santos City–Naglaum si Rhoa Wadingan ang Tourism Officer sa lungsod sa Glan , Sarangani Province nga dili ma-apektohan ang ilang torismo sa tungod sa mga nanggawas nga mga sakit karon sama sa Novel Coronavirus ug African swine fever.
Sumala pa niini nga human nasayran sa Glan LGU ang maong mga kaso gilayon silang naghimo ug precautionary measures uban ang lokal nga panggamhanan sa lungsod kung asa gilayong nagpakanaog ug executive order si Glan Mayor Vivien Yap sa tanang resort owner ug uban pang tourism facility sa ilang lugar nga dili una modawat ug mga torista nga gikan sa Mainland China ug uban pang lugar nga labing apektado sa N-CoV.
Samtang nagmontar usab ug hugot nga check point ang Glan sa ilahang boundaries’ sa Davao Occidental sa yuta ug sa kadagatanan aron nga dili na masubli ang pag palusot sa mga karne sa baboy sa ilahang lugar gikan sa probinsiya nga adunay daghang kaso sa ASF.
Nasayran nga karong umaabot nga Abril, i-selebrar sa Glan ang ilahang Mahin Festival kung asa gilauman nga dagsaon kini ug daghang torista tungod sa ginapanghambog sa Glan nga white sand beaches ug aduna man usab silay duha ka mga diving site nga abrihan sa publiko. (Dave Silagan)
