BACOLOD CITY – Ginabulubanta nga nagdangat sa kapin P30 mil pesos nga kantidad sang kagamitan kag cash ang nakuha sang suspek nga nagpakilala recruiter halin sa biktima kahapon sang hapon sa isa ka mall diri sa Bacolod.
Nakilala ang biktima nga si Albert Legaspi, 21 anyos ang edad kag pumuluyo sang Victorias City, samtang ang suspek naman amo gihapon ang makapila ka beses na nga gin-reklamo sa pulis nga amo si Karl Fernandez.
Suno sa biktima nga may mga las 2:30 kahapon sang hapon magkaupod sila sang suspek nga nagsakay sa taxi pakadto sa isa ka daku nga mall sa Bacolod.
Sa pag-abot na didto, nagpangako sa iya si Fernandez nga buligan niya ini na makasulod sa trabaho kag kabahin diri amo ang pagpaidalum sa training kon diin dapat niya ibilin ang iya mga gamit bangud indi ini pwede sa sulod.
Ginsunod man sang biktima ang hambal sang suspek kag ginbilin sa baggage counter ang iya bag, apang naglawig lang sang pila ka oras wala na nakabalik pa si Fernandez kag sang iya ginlantaw wala na ang iya bag sa baggage counter.
Kalakip sa nakuha sang suspek halin kay Albert amo ang iya 4 ka cellphone nga nagabalor tanan sang 16 mil pesos, cash nga P4,400 kag Rolex nga relo nga nagabalor sang P10 mil pesos.
Bangud sini, nagpadulong na lamang sa Police Station 1 ang biktima kag nagpa blotter./dyHB BACOLOD
