General Santos City—Gipanghimakak ni Traffic Enforcer Badrodin Mustapha, ang akusasyon sa usa ka drayber nga si alyas Robert, nga sila ang nangutong ngadto kaniya sa kantidad P200.00 bugti sa paghatag sa susi sa iyahang motorsiklo nga gisikop sa maong traffic enforcer niadtong milabayng semana.
Kahibaluan nga mireklamo ang usa ka alyas Robert og nakuhaan niini og video ang pagtunol ngadto kang Mustapha og kwarta aron ibalik ang susi sa motorsiklo og dili pag isyu sa Temporary’s Operating Permit kon TOP.
Matud pa ni Mustapha nga tinuod nga siya ang nakita sa video apan wala matud pay kamatuoran ang maong akusasyon. Igo lamang matud pa silang milingkud sa gawas sa usa ka gambalay sa inilang shopping Mall sa Lagao og walay nahitabong negosasyon kaniya og sa reklamante.
Tungod sa maong iskandalo sa traffic enforcer giawhag karon ni City Legal Officer Atty. Clarin ang reklamante nga muadto sa iyahang opisina og pormal nga mupasakag reklamo aron mapasakaan nilag kaso ang nalambigit nga mga traffic enforcer nga matud pa nangutong ngadto kaniya.
Aminado si Atty. Clarin nga lisod alang kanila sa pagdesiplina sa mga traffic enforcer tungod sagad sa mga reklamante ang dili mupasaka og pormal nga reklamo. (Emir Bariquit)
