Malaybalay City, Bukidnon – Gipa-andam nang daan sa National Confederation of Transport Union o NCTU-Northern Mindanao ang sumasakay nga publiko kon ugaling ma-aprubahan ang ilang iduso nga pagtaas sa pletehan.
Una niini nakatakdang iduso sa grupong NCTU- 10 ang balor peso ngadto dos pesos nga usbaw sa pletehan sa mga jeep pasayruhan ngadto sa LTFRB-10 sa sunod nga semana.
Kini sa tuyo nga makasugakod ang mga operator ug driver tungod sa giingong mibug-at pagsamot ang ilang kalbaryo ilabina sa pagsaka sa presyo sa produktong petrolyo.
Sa interview sa RMN Malaybalay ngadto kang NCTU regional coordinator Joel Gabatan gibutyag niini nga makatarunganon ang ilang pangayuon nga usbaw tungod sa pagsaka sa mga presyo sa batakang palaliton diin apektado ang transport sector.
Matud niya nga kaniadto nagwelga sila aron supakon ang mga gidusong balaudnon nga makahatag kanila ug kalbaryo apan tungod kay wala silay nahimo, gi-undang nila kini hinungdan nga magduso na lang usab sila ug dugang kita sa mga drivers.
Samtang gipahayag usab sa LTRFB nga hulaton nila ang petition sa grupo aron paminawon ang ilang mga rason kon nganong angay ihatag kanila ang usbaw sa pletihan.
