Davao City – Nagapaabot karon ang Southeastern Mindanao Diversified Driver Operators Cooperative (SEMDOCC) og pormal nga komunikasyon gikan sa kaulohan labot sa ipahigayong nationwide transport strike karong September 30, 2019, adlaw’ng Lunes alang sa protesta labot sa gisugyot nga jeepney phaseout nga kabahin sa Public Utility Vehicle (PUV) modernization program sa gobyerno.
Sa interbyu sa DXDC RMN Davao kang SEMDOCC President Maning Duran, gibutyag niini nga wala pa silay nadawat nga komunikasyon rason nga dili pa usab sila makadeklara nga sila moduyog sa maong panagtigum.
“Kung dili mi makadawat og komunikasyon, pasabot ana dili mi mo-join niana kay lisod man kaayo nga dili mi maapil sa meeting sa Manila unya apilon mi diri, dili na siya tama. Kung naay komunikasyon, amo man pud na siyang ipahibalo kay mudeklara man pud mi ana isip pagsuporta,” saysay ni Duran.
Saysay ni Duran posibleng gikonsidera sa kaulohan nga anaa gihapon ilawom sa balaod militar kun martial law ang Mindanao rason nga wala kini gihatagan og komunikasyon.
Dugang sa SEMDOCC President nga walay problema kanila ang dili pag-apil sa maong panagtigum tungod kay anaa usab sa kaulohan ang mga opisina sa mga hingtungdang ahensya ug ang Malakanyang asa pasubawan sa ilang mulo ug panawagan.
RadyoMaN Kirby Manzon
