Giklaro ni Gov. Bambi Emano nga wala nay gipangayo nga travel pass ang Provincial Health Office ug bisan unsang ahensiya sa probinsiya, gawas lang sa Philippine National Police nga mangayo’g “travel authority” niadtong dili APOR o authorized persons outside residence.
Kini ang gipasabot sa gobernador tungod kay daghan pa gihapon ang naglibog kung gikinahanglan pa ba maglukat og travel pass una makasulod ug gawas sa Misamis Oriental.
Matud sa opisyal nga ang travel pass gihatag kaniadtong ubos pa ang lalawigan sa General Community Quarantine apan karon nga Modified GCQ na ang Misamis Oriental, wala nay travel pass ug uban pang rekisitos nga pangayuon ang checkpoints sa tanang gustong mosulod-gawas sa lalawigan.
Dugang pasabot sa gobernador nga ubos sa kamandoan sa National interagency task force, kinahanglang maglukat sa travel authority gikan sa Police Provincial Office kadtong dunay tuyo sa Misamis Oriental.
Pananglitan, gikan sa Cagayan de Oro, kung asa misaka ang ihap sa nagpositibo sa coronavirus disease 2019, kinahanglang maglukat sa travel authority kung mosulod sa Misamis Oriental ug vice versa.
