Davao City – Giluagan na sa COVID-19 task force ang travel requirements pasulod dinhi sa Davao City.
Kini ang gikumpirma ni Davao City COVID-19 Focal Person Dr. Ashley Lopez atol sa interview sa DXDC RMN Davao.
Sumala sa health official nga pipila sa mga gitanggal mao ang travel authority ug medical certificate subay sa anunsyo usab sa Department of the Interior and Local Government kun DILG.
“Just last week… ato nang gitangtang ang travel order nga medical certificate, even ang RT-PCR is boluntaryo nalang siya. Kung naay pasahero o returning resident o OFW nga gusto magpa RT-PCR, naay available sa Davao International Airport, that is voluntary nalang, dili na compulsory,” sulti ni Lopez.
Samtang, magdepende sa matag Local Government Units kun LGUs ang kinahanglan pang rekisitos sa pagsulod sa matag lokalidad.
Bisan pa man niini, padayong panawagan ni Lopez nga sundon gihapon ang guidelines sa syudad ilabi na sa pagtabang sa pagpakunhod sa kaso sa COVID-19 sama sa pagtamod sa minimum health standards.
RadyoMaN Renz Barbarona
