ILOILO City – May sabat si Congressman Jerry Treñas sa palabtik ni Mayor Jose Espinosa III nga indi ini magpapayong sa drug lord.
Suno kay Treñas, kon ang ginatumod ni Espinosa ang picture niya nga ginpayongan siya ni Kap Nene Odicta snag Tanza Esperanza, City Proper, sang amo nga tion naghapit lang si Treñas sa blessing sang chapel.
“Masako na ako sadto amo gani nga pagpabalo nila nga may schedule didto, nakashorts lang ako gani, naghapit lang ko makadali, ang nagapayong sa akon kapitan sang Tanza Esperanza,” ang kabahin sang pahayag ni Treñas sa interview sang RMN Straight to the Point program.
Suno kay Treñas indi lang siya ang opisyal nga nagkadto sa amo nga blessing bangod madamo man siya nga kaupod nga konsehal.
“Ang amon nga pagkadto da wala man kami naga inistorya about sa drugs,” pahayag ni Treñas.
SA SURVEY:
May pahayag man ang kongresista tuhoy sa ginapahayag pagdiscredit ni Mayor Jose Espinosa III sa survey sang Random Access Consultants Inc. (RACI).
Nag-umpisa ini matapos gintawag ni Espinosa nga “istorya kuris-kuris” ang survey sang RACI sa pagka-alkalde diin 29.5% lang ang iya nga nakuha samtang masobra 66% naman ang nakuha ni Treñas.
“Ang survey giya lang ina,” ang pahayag ni Treñas.
May sabat man si Treñas sa pahayag nga ginpabaya-an sadto si Mayor Espinosa sa iya kandidatura bilang bise alkalde.
“Well…gintinguhaan ko gid nga mabuligan siya,” ang kabahin sang pahayag ni Treñas.
TREÑAS- EPSINOSA TANDEM:
Indi man sarado apang daw indi na makita ni congressman Jerry Treñas nga mag-updanay sila ni Mayor Espinosa sa May 2019 midterm election.
“Kadamo na sang ila ginpangkakas, kadamo naman sang ila ginpahalin… indi man kita makasiling nga sarado… indi ko na makit-an kon paano pa kami makainupdanay.”
PCTTO Tags: Visayas, DYRI774, RMN Iloilo, Iloilo City, Iloilo
