General Santos City—Nagpadayon pa sa kasamtangan ang imbistigasyon sa operatiba sa Police Station 4, sa nahitabong pagpamusil patay sa lain na usab nga tricycle Driver nga nahitabo sa Yumang Street, boundary sa Barangay City Heights ug Barangay San Isidro ning dakbayan.
Giila ang biktima nga si Peter Jake Panes, 38 anyos, residenti sa Purok Matibay, Barangay San Isidro ning syudad. Alas 9:00 ang takna sa dihang gipusil ang nasangpit nga biktima sa duha ka mga suspek nga sakay sa motorsiklo.
Subay sa inisyal nga imbistigasyon nasuta nga gikan sa Mabuhay Road ang biktima ug gisundan kini sa mga suspek, pag abot atubangan sa St. Michael Church, dayon gipusil pila ka higayon igo sa nagkandaiyang parti sa lawas. Paspas nga misibat ang mga suspek human sa insidenti samtang ang biktima gidala pa sa Mindanao Medical Center apan gideklara kining dead on arrival.
Druga usa sa mga anggulong gitutukan karon sa kapulisan kalabutan sa insidenti human gikaingong involved ang nasangpit sa iligal nga druga.
