Patay ang drayber sa trisikad nga mao si Philip Omarito nga taga Barangay 31 ning dakbayan human kini makaangkon og duha ka samad dinunggaban sa dughan nga miresulta sa iyang hinanaling kamatayon.
Nakit-ang patay ang 40 anyos kapin nga biktima sa J.R Borja Extension, Barangay 36 ning syudad kinsa naligo na sa iyang kaugalingong dugo ug nagbuy-od na sa dalan nga bahin.
Gibutyag ni Dr. Christian Caballes, ang medico legal sa Scene of the Crime Operations kon SOCO nga ila pang ipaubos sa otopsiya ang biktima aron masayran kung unsa kalawom ang samad sa biktima.
Gibutyag ni SPO2 Marvin Bolanio, ang imbestigador sa Cogon Police Station nga nahitabo ang insidente mga alas-2:15 kaganinang kadlawon.
Dugang pa ni SPO2 Bolanio nga basi sa iyang imbistigasyon nga aduna matud pay usa ka batan-on nga miduol sa biktima nga natulog sa iyang trisikad, dayong dunggab sa biktima.
Sa karon padayon pang giila sa kapolisan sa Cogon kung kinsa ang maong suspek samtang gidala na sa Bollozos Funeral Homes ang patayng lawas sa biktima alang sa otopsiya.
By: RadyoMaN Ellah Baculio
PC: RadyoMaN Nitz Arancon
