Miikyas kagahapon sa buntag ang usa ka piniriso sa Misamis Oriental Provincial Jail ning syudad.
Nasayran nga usa ka trustee ang maong piniriso, ug gisugo kini paglabay sa basura apan wala na kini makabalik.
Ang maong piniriso naila nga si Jonathan Ramos, 45 anyos, taga Manolo Fortich Bukidnon ug adunay kaso sa illegal nga droga.
Matud ni Jail Warden Dominador Tagarda nga wala kini mabantayi sa mga gwardiya, apan napahibalo na nila ang pamilya sa suspek, aron nga aghaton kini nga ipasurender.
Nasayran nga tulo ka bulan na nga trustee sulod sa provincial jail si Ramos hinungdan nga nakompiyansahan sa mga gwardiya.
Ang maong suspek itumon og panit, 5’4 ang gitas-on, ug naka-orange og sinina.
Tungod niini giaghat karon ni warden Tagarda si Ramos nga mosurender sa kapolisan o mobalik sa provincial jail, aron nga dili na madungagan pa ang iyang kaso.
By; Radyoman Aiza Enloran
