Davao City- Mibalik na sa normal ang tubig sa Matina river ug Bunawan river human mitaas kagabii tungod sa kusog nga bundak sa ulan sa syudad sa Davao. Sumala ni Archie Reyes, duty officer sa Davao City Disaster Risk Reduction Management Center (DCDRRMC) , karong buntag balik na sa normal ang tubig sa sapa sa maong mga lugar.
Kapin sa usa ka gatos ka mga pamilya ang namakwit kagabii human nakasinati og pagbaha ang lima ka mga purok sa Barangay Matina Crossing human miapaw ang tubig gikan sa Matina river mga alas 10:25 kagabii tungod sa kusog nga ulan.
Sumala ni Halili Hontillado, Barangay Disaster Risk Reduction Management Center head sa Matina Crossing, mokabat sa 594 ka mga individual ang hinay-hinay nang namalik sa ilang mga balay karong kadlawon. Matud ni Hontillado, ila pang ginasusi karon ang giingong usa ka balay nga naanod tungod sa baha. Nakasinati sab og brownout ang lima ka purok sa Matina Crossing human gipalong sa Davao Light and Power Company ang linya aron likay disgrasya.
Kasamang Bernard Pantallon
