Davao City – Subli na usab muatubang sa katawhang Pilipino si Pres. Rodrigo Duterte alang sa iyahang ika-upat nga ‘State of the Nation Address’ kun SONA karong alas-4:00 sa kahaponon.
Gumikan niana, gipangandaman usab sa Trade Union Congress of the Philippines (TUCP) nga mamati kang Duterte kalabot sa iyang mga nahimo sa laing usa ka tuig sa unang tulo sa unom ka tuig sa termimo sa gahum.
Matud ni TUCP Spokesperson Allan Tanjusay, usa sa mahinungdanong promesa ni Duterte niadtong 2016 presidential election campaign mao ang pagtuldok sa contractualization kun palisiyang ‘end of contract’ kun ENDO sa nasud.
Sumala ni Tanjusay, hangtud karon wala gihapon matuman sa administrasyon ang pagpahunong sa contract system of labor employment ug daghan gihapon sa mga kumpanya nagpatuman niini nga pamaagi sa pagpanabarho.
Segun ni Tanjusay, buot usab nilang mabati gikan kang Duterte kung unsang palisiya ang iyang himoon diha sa pagpataas sa suweldo ug pagpaubos sa presyo sa mga basic ug prime commodities.
Namatikdan sa maong organisasyon ang mga nahimo sa Duterte regime sama sa mga balaud nga iyang gipirmahan pagka-balaud sama sa Universal Health Care Law ug uban pa nga naghatag og dugang benepisyo sa tanang trabahante.
Alang kang Tanjusay, tutokan sa Duterte administration ang paghuman sa ENDO aron una kini mukanaog sa pwesto sa 2022 may igo nang proteksiyon, sweldo ug benepisyo ang mga trabahante sa pagpanarbaho.
RadyoMaN Joel Viray
