Tulisan patay human nakigpinusilay sa guwardiya

112

Patay ang usa ka tulisan human kini nakigpinusilay sa security guard sa duha ka mga security guard sa BUKTRAMCO Gasoline Station sa Purok 2, San Jose, Malaybalay City alas 4:30 kagahapon sa kadlawon.

Sa interview sa RMN Malaybalay ngadto kang Police Lt. Col. Jerry Tambis ang hepe sa Malaybalay City Police Station gibutyag niini nga nisulay unta pagtulis ang mga suspek sa mao nga gasoline station apan nakasukol ang duha ka mga guwardyia nga sila si Jerico Gallero, 25 anyos ug Anggelo Torne, 21 anyos nga susamang security guard sa BUKTRAMCO ug lumulupyo sa P-2, Managok, Malaybalay City.

Samtang naila usab ang duha sa mga suspek nga sila si Ronald Fuentes ug Jason Bularon mga hingkod na ang panuigon nga taga Purok 5, Magsaysay, ning siyudad.


Matud ni Col. Tambis nga nisibat ang mga suspek paingon sa Brgy. Magsaysay human naigo sa bala ang sa usa ka suspek nga si Ronald Fuentes.

Kagahapon sa udto, narekober sa kapulisan ang patay nga lawas ninii sa Purok 5 sa Magsaysay human nga gibiyaan sa iyang mga kauban.

Una niini, alas sa 3:30 sa kadlawon gahapon una nang nanulis ang mga suspek sa security guard sa Lumina Homes nga nahimutang sa Purok 1, Brgy Casisang, diin ang biktima naila nga si Nelson Evangelita, 39 anyos, minyo nga taga Purok 2, Barangay Manalog, Malaybalay City samtang nagduty kini.



Nakuha sa mga tulisan ang motor, armas nga .38 calibre ug ang 13-mil pesos.

Facebook Comments