Patay nang nakit-an ang tulo ka batan-on kinsa niadto pang Domingo wala makauli sa ilang balay human matud pa gidakop sa kapolisan sa Tagoloan Municipal Police Station.
Nakita ang patayng lawas nilang Reynard Andales, 23 anyos; Vicente Viemen, 24 anyos ug Abales Clifford, 21 anyos nga gihulog sa usa ka pangpang sa Saray, Bagong Silang, Malitbog, Bukidnon.
Apan matud ni Police Senior Insp. Allan Oniano, ang hepe sa tagoloan Municipal Police Station nga wala na-record sa ilang buhatan ang pagdampot sa tulo ka batan-on.
Nasayran nga usa ka Neil Flores sa Tagoloan Police station ang usa sa midampot sa mga biktima niadtong buhi pa kini.
Gibutyag usab ni Senior Insp. Oniano, nga iyang ipa-lineup ang iyang mga polis aron matudlo kung kinsa kanila ang midampot sa tulo ka biktima niadtong Domingo.
Gipahayag ni Dr. Christian Caballes, ang medico legal sa Scene of the Crime Operatives kon SOCO nga adunay duha ka bala nga nakita sa crime scene ug mga tulo ka adlaw nang patay ang mga biktima.
Dugang pa ni Caballes nga ang mga biktima pulos adunay samad pinusilan sa ulo.
