Na-engkwentro sa mga sakop sa Task Force Oro, Criminal Investigation and Detection Group, militar ug ubang unit sa kapolisan kaganinang pasado alas dos sa kadlawon, ang mga private army ni Zone-3, Brgy. Kinawe Kapitan Cherry Barros sa Libona, Bukidnon.
Nasayran nga isilbi unta sa mga otoridad ang ilang dalang unom ka search warrant batok kang Kapitan Cherry Barros, apan kalit na lamang silang gipaulanan og bala sa mga armadong lalaki.
Gibutyag ni SPO4 Noel Oclarit sa CIDG-Cagayan de Oro City, nga tumong sa maong search warrant ang pagsusi sa compound ni Kapitan Barros human sa sila makadawat og report, nga adunay daghang mga armas ug private army ang nasangpit nga opisyal.
Samtang………
Gani apan upat ka balay ni Barros sulod sa compound ang ilang target sa search warrant, kung asa nakuha ang mga daghang high powered ug long firearms, mga eksplosibo, granada ug ubang matang sa mga gagmayng armas.
Dugang pa ni SPO4 Oclarit, nga dihang mihimo sila sa pagsilbi sa search warrant pinaagi sa demokrasyang paagi apan kalit nalamang silang gipamusil, hinungdang samaran ang tulo ka miembro sa Task Force Oro.
Hinuon, luwas na ang duha sa maong mga sundalo nga silang Corporal Rafael Salido ug usa ka Corporal Dumpa kinsa anaa na sa 4th ID hospital, apan pabilin pang gi-obserbahan si Corporal Daniel Manatad sa usa ka pribadong hospital human kini maigo sa dughan.
Nagtuo si SPO4 Noel Oclarit sa CIDG-Cagayan de Oro City, nga dili gakadutlan sa bala ang ilang kontra nga mga armadong lalaki.
Kini tungod kay wala siyay nakitang samaran gikan sa mga suspek, apan tulo na ang samaran sa ilang kaubang Task Force Oro.
Apan bisan pa man niini, na-neutralized pa gihapon sa mga otoridad ang maong mga suspek kinsa ilang gipanggapos ug gipangkuhaan sa ilang mga profile.
Samtang……
Basi sa nakuhang imbistigasyon ni SPO4 Oclarit, nga gikan ang maong mga private army ni Kapitan Cherry Barros, sa pipila ka lugar sa Misamis Occidental ug adunay dalang mga nagkalain laing klase sa armas.
Gani gibutyag ni Oclarit, nga gipabuthan pa sa maong mga armado og Granada ang ilang mga kauban nga mohimo sa pag-search sa compound ni Kapitana, apan maayo na lamang nga wala miboto ang nasangpit nga eksplosibo.
Sa karon padayon pa ang gihimong search operation sa mga otoridad ug ang pag-account sa ilang nakuhang mga armas u gang ihap sa mga suspek.
Luwas na matud pa sa delikadong kahimtang ang duha sa tulo ka sundalong sakop sa Task Force Oro sa 4th ID Phil. Army, kinsa napusilan atol sa ilang pag-abag sa CIDG-Cagayan de Oro sa pagsilbi og search warrant batok kang Brgy. Kinawe Kapitan Cherry Barros sa Libona, Bukidnon.
Apan ang usa niini ang nagpabilin pang gi-oberbahan tungod kay sa dughan kini naigo ug walay exit wound ang naangkon niining samad pinusilan.
Kini ang nakuhang report ni SPO4 Oclarit gikan sa Task Force, kinsa miingon nga sa dihang wala pa sila nagsugod sa pag-search sa maong target nga balay, aduna na silay nakitang mga armas sa kadaplinan.
Padayon karong gipangita ang bana ni Kapitan Cherry Barros nga si kanhi Kapitan Sarcesio Barros, tungod kay misibat kini atol sa engkwentro.
Gikabutyag nga depensa matud pa sa kinabuhi nilang Kapitan Barros ang pag-angkon nila sa mga armas, tungod kay kanhi na silang gi-ambush sa mga armadong lalaki nga miresulta matud pa sa pagkamatay sa iyang kamanghorang anak nga lalaki.
Matud pa nga away sa yuta ang kasagarang hinungdan sa panag-engkwentro sa maong barangay, hinungdang aduna silay mga armas.
Gituhoan ni SPO4 Oclarit, nga samarong nakasibat si Sarcesio Barros, ang bana ni kapitan kauban ang laing armadong lalaki.
Gibutyag usab ni CIDG chief Melgar Debara, nga duha ka kaso ang posibling ipasaka nila batok sa mga suspek.
