South Cotabato–Dili na makasalmot pa sa unsa man nga mga transaksyon sa gobyerno, partikular na sa Department of Social Welfare and Development ( DSWD 12) ang tulo ka mga suppliers human nga gi-blacklist sa maong ahensya.
Kini subay na usab sa kumpirmasyon ni DSWD 12 Regional Director Cezario Joel Espejo. Ang tulo matud pa ka mga suppliers ang gilangkuban sa duha ka advertising and marketing company ug usa ka furniture and office supplies kansa pakyas nga maka -comply sa gipangayong purchase requirements sa ahensya.
Usa sa mga blacklisted supplier ang Rubee Marketing nga nakabase sa Cotabato City kung asa wala matud pa nadeliver ang P524, 750 nga kantidad sa furniture and fixtures sa 2018 purchase order (PO).
Samtang ang QPC Advertising ang nakontrata nga maghimo ug 2,338 ka mga red vest nga may logo ug gama sa brush twill fabric alang sa mga Listahanan sa workers sa nakalabayng tuig, apan pakyas sila nga maka-comply ang una na nilang nasabutan sa Bids and Awards Committee sa ahensya human nga ang gi-deliver nga vest nga nagkantidad ug P 701,400 ang gi-ilisdan ug blue thin fabric.
Ang ikatulo mao ang Marbel GEPCARS PRINTING PRESS, kung asa ang gi-deliver matud pa kanila mao ang single string advocacy notebook nga wala usab nagsunod sa kasabutan nga double string specification kansa nagkantidad ug P50, 000.
Matud kang Espejo ang maong mga suppliers ang blacklisted ug gidid-an na nga mag-apil sa tanan nga government project biddings ug procurement process sulod sa usa ka tuig.
Gipunto pa sa opisyal nga ilawom sa RA 9184, ang private contractors nga mulapas sa procurement laws ang mag-atubang ug criminal ug civil liabilities, permanent disqualification sa pakig-transaksyon sa bisan asang ahensya sa gobyerno.
Kalabutan niini gipahimangnuan ni Espejo ang mga suppliers nga nagasalmot sa bidding sa mga proyekto sa ahensya nga sundon gyud ang nasabutan sa bid listings. Ang lakang gihimo sa DSWD 12 kabahin matud pa sa ilang kampanya nga mahimong corrupt-free institution ang ahensya.
