Boluntaryong misurender kagahapong adlawa ang tulo ka sakop sa Militia ng Bayan-New Peoples Army, mga alas-4:00 sa hapon ngadto sa kapolisan sa Lumbia Police station.
Naila ang tulo nga silang alyas Ivan, 27 anyos, minyo; alyas Ranran, 22 anyos, ulitawo ug alyas Nekme, 22 anyos nga pulos taga Sitio Man-ai, Barangay Tignapoloan ning dakbayan.
Nasayran nga mihimog Internal Security Operation ang mga personahe sa Lumbia Police station, sa pagpanguna ni Police Capt. Dennis Ebsolo sa Sitio Man-ai, Brgy. Tignapoloan ubos sa supervision ni COCPO Director Police Col. Henry Dampal.
Lakip sa gisurender sa tulo ang ilang mga armas, bala ug explosives, sama sa Garand Rifle nga adunay 15 ka buhing bala ug duha ka magazine; Carbine Rifle nga adunay 20 ka buhing bala ug duha ka magazine; duh aka Rifle grenade; Cal. 45 nga pistola nga adunay 10 ka buhing bala ug usa ka hand grenade.
Sa karon, temporaryong gikustodiya sa Lumbia Police station ang mga rebelde lakip na ang ilang dalang mga armas.
