Nasikop sa mga ginsakpan sa Police Station 4 Carmen ang tulo ka tawo sa usa ka entrapment operation diha sa Zone 9 Brgy. Cugman ning dakbayan sa pagpanguna ni PSI Mario Mantala ubos sa superbisyon ni PCI Ritchie Salva Station Commander kauban usab ang mga ginsakpan sa Police Station 10 Cugman.
Mga suspetsado naila nga silang Nestor Paler, 45 anyos, menyo, residente sa NHA Brgy. Kauswagan, Reche Alpas, 31 anyos, menyo, residente sa gumamela Ext. Brgy. Carmen ug Kenneth Castro, 23 anyos ug residente sa Zone 6 Brgy. Carmen ning dakbayan.
Matud pa nga nasapon kining mga suspetsado nga nag unload sa mga wala na record nga mga items gikan sa DAEWO delivery truck sa ORO TIME MARKETING nga adunay plate # JEM 481.
Nakuha sa ilang posisyon ang mga kinawat nga items sama sa lima ka box nga phoenix cyclomax titan 4t motorcycle oil 12X1 liter nga nagkantidad og kapin 14,500 pesos, dise-otso ka karton sa philflex nagkantidad ang matag usa og kapin 19,600 pesos, usa ka box sa triton metal primer 4X4 liter nga nagkantidad og kapin 2,000 pesos, duha ka box nga enamel 12X1 liter nga nagkantidad og kapin 5,000 pesos, tulo ka hydraulic oil nga nagkantidad og kapin 10,400 pesos, duha ka box nga sanding sealer 4 liters nga nagkantidad kapin 7,800 pesos, usa ka box nga adunay sulod nga napulo ka ream sa water proof abrasive paper nga ang matag ream nag kantidad og 15,000 pesos ug usa ka box nga grinding wheel 25 pcs nga nagkantidad og 1,200 pesos.
Nasayran nga mokabat kini tanan og kapin sa 148,100 pesos ug nakuha usab sa ilang posisyon ang duha ka motorsiklo nga Yamaha Sniper MX 150 nga adunay color combination nga pula ug itom nga adunay plate # nga KC 80845 ug SUZUKI Raider 150 nga adunay color combination nga silver ug gray nga adunay plate # nga 3136 KS lakip na ang duha ka cellphone.
Dugang pa nga nakuha usab sa posisyon ni Paler ang tulo ka heat sealed sachet sa transparent cellophane nga adunay sulod sa gitoohang shabu.
Insidente natigayon alas 10:50 sa gabie sa nasangpit nga dapit.
Samtang mga suspetsado karon ang detinado na sa Maharlika Detention Cell ug posibleng mag-atubang sa kasong ipasaka batok kanila.
By: RadyoMan Anne Jane Duhaylungsod
