Nag positibo sa methamphetamine ang tulo ka mga taxi drivers atol sa gipahigayong Oplan Harabas sa Philippine Drug Enforcement Agency o PDEA Region 10.
Mahinumduman nga ning bag-o, nagpahigayon sa Oplan Harabas ang PDEA tungod sa datus nga ilang nakuha nga dinhi sa Pilipinas niadtong tuig 2001, mitala lang og 2,026 ang road accident sa nasud apan pag abot sa tuig 2014, mikabat kini sa 15,195.
Sagad kanila ang ubos sa impluwensya sa illegal drug, sama sa shabu, ecstacy, cocaine, ug uban pa.
Tungod niini, gilusad sa PDEA ang Oplan Harabas isip anti drug campaign alang sa mga driver sa pampasaherong jeep, taxi, tricycle ug uban pang public utility vehicles.
Dinhi sa Cagayan de Oro, gipahigayon sa PDEA ang Oplan Harabas particular sa westbound terminal ug east bound terminal inabagan sa LTO, LTFRB, PS3 ug PS7.
Sa westbound, mikabat sa upat ka mga van driver, pito ka taxi drivers ug 11 ka jeepney drivers ang na drug test samtang sa east bound terminal mikabat sa 17 ka van drivers, 11 ka tricycle drivers, 25 ka taxi drivers ug 33 ka jeepney drivers ang na drug test.
Sa maong eksaminasyon, tulo ka mga taxi drivers ang nag positibo busa gipa ilalom kini sa interview sa PDEA ug gi-report na usab sa LTO ang maong resulta.
