General Santos City—Tugpa sa ospital ang magtiayon human nga natambling ang gisakyan nilang motorsiklo gumikan sa iro sa Highway nga bahin sa Barangay Lun Masla Malapatan.
Ang mga biktima nailang silang si Geraldo Boniao ug Annalyn Boniao pulos hingkod ang panuigon ug residente sa Barangay Levi Malapatan Sarangani Province.
Subay sa pamahayag sa mga kabanay sa biktima alas 8:00 ang takna sa gabie, Domingo, Setyembre 3, 2017 dihang gikan sa Gensan ang magtiayon, pauli na unta sa ilang panimalay.
Ilang nabanggan ang usa ka iro nga matud pa mikalit ug tabok sa dalan nga miresulta sa pagkabalintong sa mga biktima. Samad sa tuong bahin sa iyang siko ang naangkon sa banang si Geraldo nga maoy nagmaneho sa motorsiklo samtang pangos ang nahiagoman sa ulo nga bahin sa asawa niining si Analyn. Patay usab ang iro nga nabanggaan tungod sa kakusog sa dagan sa motorsiklo.
