Nadala sa kawad-on ug natintal sa iyang mga kauban ang usa ka construction worker busa nabuhat niini ang pagsulod ug pagpangawat sa usa ka establisemento ning syudad.
Sa interview sa dxCC-RMN, gibutyag sa suspek nga si Roger Codilla kinsa detinado na karong panahona, nga abli ang bintana sa tindahan busa nakahigayun siya sa pagsulod niini.
Dugang pa ni Codilla nga nangayo siya og pasaylo karon sa tag-iya sa establisemento tungod kay nadala lang siya sa solsol sa iyang mga kauban sa trabaho ug sa iyang kapobrehon.
Nasayran nga usa sa mga gikawat ni Codilla nga butang mao ang sapatos, cash nga singko mil pesos nga gikuha niya sa hunos ug sabon humot.
Nagpasalamat usab si Codilla sa kapolisan nga midakop kaniya nga wala siya pasakiti niini atol sa iyang pagsulod sa establismento nga gipanag-iyahan sa usa ka Benrad Calonia.
