BACOLOD CITY – Opisyal na nga nagpadulong sa Police Station 3 kag nagpa-blotter ang isa ka 18-anyos nga dalaga nga gintuyo nga himuslan sa overpass nga yara sa atubang sang isa ka mall sa Brgy. Mandalagan diri sa ciudad sang Bacolod sadtong nagligad nga Lunes, Pebrero 5 sang gab-i.
Ginpahayag ni Police Station 3 Commander, Police S/Insp. Junry Batadlan nga ang insidente natabo sa tunga-tunga sang las 9 kag las 10 sang gab-I sadtong Lunes kon diin ang amo nga babayi nga naga obra sa isa ka food chain ang buot na kuntani nga magpauli.
Base sa statement sang biktima, sang ini siya ang nagsaka, nakita niya nga may duha ka mga lalaki.
Sang naglabay na siya sa atubang sang amo nga mga lalaki, suno sa dalaga, isa diri sa ila ang naghawid sa iya kamot kag nagtuyo nga ubahon ang iya pantalon, apang ini siya ang nakapalagyo.
Pahayag sang biktima nga dira siya masami naga-agi kon magpauli na kon gab-i bangod delikado kon magtabok rekta sa highway kag subong lang niya nakita ang mga suspek.
Apang kon liwat niya ini nga maatubang ang duha, mahimo niya nga identify ang mga ini.
Sa karon, suno kay Batadlan ginatinguhaan nila nga mapa identify ang mga suspek agud nga ini sila nga mapasakaan sang kaso.
Tuyo man sang Station 3 nga ayuon ang mall nga kon mahimo mabisitahan sang ila mga gwardiya, from time to time, ang overpass, lakip na ang pagbutang sang Barangay Tanod kag roving police kon gab-i./dyHB BACOLOD
