Roxas City, Capiz- Ginalauman nga magapadayon tubtob bwas ang pag-ulan nga mabatyagan sa pila ka mga lugar sa Luzon dala sang monsoon rains nga ginapabaskog naman sang Bagyong Egay.
Ginpahayag sang PAGASA, magadala ini sang mahina tubtob sa katamtaman nga pag-ulan ang Hangin Habagat sa Metro Manila, Ilocos Region, Cordillera, Zambales, Bataan, Tarlac, Pampanga, Bulacan, Mindoro Provinces kag Palawan.
Posible nga mangin low pressure area okun LPA na lamang ang amo nga bagyo sa sulod sang 24 oras sa tion nga ini ang maghina. Sa subong dala sini ang pwersa nga 45 tubtub 60 kilometros kada ora kag halos wala na nagalakat gikan sa iya nahamtangan ukon stationary ang Tropical Depression Egay nga ulihi nakit-an sa kalayuon nga 195 kilometros “East Northeast” sang Aparri, Cagayan. .
Nakataas sa gihapon ang Signal Number 1 sa Batanes kag Babuyan Group of Islands.
