Roxas City, Capiz – Dalayon na nga nakasulod sa Philippine Area of Responsibility(PAR) ang ginabantayan nga Low Pressure Area(LPA). Ini ang ginhingadlan sang PAGASA nga Tropical Depression “JENNY”. Ang Bagyo “JENNY” ang nakit-an alas 4 sang hapon base sa available nga yara sa 670 km nasidlangan sang Virac, Catanduanes(14.2°N, 130.4°E). Dala sini ang kabaskugon sang hangin nga nagalab-ot sa 45 km/h malapit sa sentro kag may pagbugso nga nagalab-ot sa 55 km/h. Ginpaidalom na sa Tropical Cyclone Wind Signal # 1 ang mga probinsya sang Cagayan, Isabela, Quirino, Nueva Vizcaya, Apayao, Abra, Kalinga, Mountain Province, Ifugao, Benguet, Aurora, Nueva Ecija, eastern portion sang Pangasinan, northern portion sang Quezon kalakip na ang Polillo Island kag Catanduanes. Gin-alerto naman ang publiko sa posible nga pagbaha kag landslide nga dulot sang pag-ulan.
