BACOLOD CITY – Nagdangat sa masobra P14 mil ang nakuha sang suspek halin sa nagabantay sang Uling Roasters matapos ini ginhold-up kagab-I sa Brgy. Alijis, Bacolod City.
Ang biktima nakilala kay Manuel Pineda, 20 anyos, single, pumuluyo sang Purok san Roque, Brgy. Handumanan, Bacolod City kag amo ang nagabantay sa Uling Roaster sa branch sini sa Circumferential Road, Brgy. Alijis.
Suno sa biktima nga may mga las 8:05 kagab-I, samtang nga ini siya ang naga-preparar agud kuntani nga magpanira na sang ila balaligyaan sang nagsulod ang wala makilala nga suspek kag hinali na lamang nga nagdeklarar sang hold-up.
Pahayag sang biktima nga ang suspek may ginabitbit nga “ispading” kag ini ang iya gin-gamit sa pagtaya kay Pineda.
Ginpahayag pa sang biktima nga sa iya kakulba, nagsulod ini sa banyo samtang nga gina-kawat sang suspek ang iya collection nga nagdangat tanan sa kapin 14, 560 pesos.
Sa karon padayon pa nga gina-usisa sang Police Station 7 ang insidente kag agud makilala na ang suspek nga naghimo sini.
