Ginluthang patay sang ugangan ang iya umagad sa banwa sang Barotac Nuevo, Iloilo sini lamang nga gab-i.
Ang biktima ginkilala kay Ronnie Erepol, 40 anyos sang barangay Talisay, Barotac Nuevo samtang ang suspek nga ugangan sini amo si Nelson Delmo sang amo man nga lugar.
Ginpahayag ni Police Chief Inspector Raymund Celoso, hepe sang Barotac Nuevo PNP nga madugay na nga may hiligut-anon ang mag-ugangan kag mga alas 6:30 sini nga gab-i, ginkadtuan sang biktima nga si Erepol nga tuman ka hubog ang ugangan sini kag gin-iritar.
Bangud sa pagka-impito, ginluthang ni Delmo ang iya umagad nga gintunaan sang kamatayon sini.
At large ang suspek matapos nalagyo kasunod sang insidente.
Ginapawanagan ni Celoso sa suspek nga magsungka na lamang agud indi na magdaku ang kaso nga iya paga-atubangon sa pagpatay sa iya umagad.
