Gindul-ong na kahapon nga adlaw, Disyembre 22, sang RMN Team sa Diocese of Kabankalan ang una nga batch sang relief goods kag donasyon nga natipon sa Oplan Tabang Southern Negros sang DYHB RMN Bacolod para sa mga naapektuhan sang Bagyo Odette.
Sa pagpanguna ni RMN Bacolod Station Manager Radyoman Jeony Bigay, DPA, gintan-ay sang RMN Team kay Bishop Louie Galbines ang mga natipon nga mga food items, tubig, canned goods, alcohol kag mga panapton.
Pila sa mga ini ang gindul-ong sa RMN Broadcast Center sa 17th-Lacson St., Bacolod City samtang ang iban ang ginpahapit kag may iban nga nagbantay sa caravan sang RMN Team samtang nagapadulong sa ciudad sang Kabankalan.
Ang Oplan Tabang Southern Negros first batch delivery ang nangin posible sa pagtinguha kag kaalwan sang RMN Bacolod kag RMN Foundation nga naghatag sang 100 food packs nga ginalakipan sang 100 ka tag-7 liters nga tubig, 300 kilos sang bugas kag mga canned goods.
Nahimo man ini sa bulig kag kaalwan sang mga masunod: Victorias Milling Company para sa apat ka karton nga sardinas kag 20 ka karton sang alcohol, Thrifty Fashion para sa 50 kilos nga used clothing, SYG Engineering para sa 100 ka panid sang sin, isa ka karton used clothes gikan kay Analyn Baquiano sang Woodside Subdivision sa Barangay Alijis, kag used clothing man ang ginhatag sang Kape Desi Otso, kag cash donations nanday Nena Garcia, Erika Malo-oy, Darlene Grace Castillon, Hill Benitez, Edwin Gustilo, Marg Mugatar, Pesca Family, Leo Tinosan, Gamay Madela, Glow, Fermia Javellana kag isa ka tagpalamati nga nagpamalibad sa pagpakilala.
Sa kabug-usan, nakatipon sang 13,000 pesos nga cash donations nga igabakal sang dugang nga kinahanglanon sang mga nabagyuhan.
Nagpahulam man sang ila mga salakyan sanday Atty. Arnel Lapore kag Punong Barangay Ricky Mijares sang Barangay Banago.
Daku naman ang pagpasalamat ni Bishop Galbines bangud ginsabat sang RMN Bacolod ang mga kinahanglanon sang mga ginlaslasan ni Bagyo Odette kag ila mabatyagan nga sa sini nga tion sang pagkinahanglan, wala sila nagaisahanon.
May ikaduha pa nga hugnat sang delivery sang relief goods kag donations ang Oplan Tabang Southern Negros nga patigayunon sa Disyembre 30, 2021.
