Ginakabig ni Provincial Veterinarian Renante Decena nga “wake up call” sa mga otoridad ang una nga kaso sang African Swine Fever sa Visayas nga narekord sa Abuyog, Leyte agud pabakuron pa ang mga measures agud indi makasulod sa probinsiya ang ASF nga makapatay sang linibo ka mga baboy.
Sa interview sang DYHB kay Dr. Decena, ginatinguhaan karun nila nga wala sang makasulod sa Negros Occidental nga pork products gikan sa mga lugar nga apektado sang ASF kag mapabilin nga ASF-Free ang probinsiya ilabi ini ang major supplier sang baboy sa Luzon kag nagapanguna sa bug-os nga Pilipinas kun backyard hog raising ang pagahambalan. Suno kay Dr. Decena, yara na karun sa 85 porsyento ang backyard raising sa Negros Occidental.
Kapin sa 4,000 tubtob 6,000 ka mga baboy ang gina-produce sang Negros Occidental tagsa ka bulan kag dako ini nga income sa mga manugsagod.Ini ang man ang rason kun ngaa may gintukod nga ASF Task Force ang probinsiya nga amo ang hugot nga nagabantay sang mga borders agud indi makasulod ang mga produkto halin sa lugar nga apektado sang ASF kag santo sa report sang Provincial Veterinary Office (PVO) nagdangat na sa 32.641 tonelada sang nagkalain-lain nga pork products ang ila nakumpiskar halin sang Enero 1 tubtob Disyembre 27, 2020.
Halin pa man sang 2019, gin-ban na sa probinsiya ang pag-sulod sang pork and pork products halin sa mga lugar sa Luzon kag Mindanao nga naigo sang ASF. Mismo si Gov. Bong Lacson ang nagpaguwa naman sang Memorandum No. 01-18-012 nga nagabawal sa pagsulod sang mga baboy kag pork products sa probinsya halin sa Region 8 bangud sa kaso sang African Swine Fever (ASF) sa nasambit nga rehiyon.
[image: image.png]
