General Santos City— Naitala sa dakbayan sa Gensan ang pinaka-unang namatay tungod sa Covid 19. Nauna na matud pa kining gidala sa Socksargen Hospital.
Kini ang gikumpirma ni Dra. Jett Oco, Labaw sa City Health office Gensan. Usa matud pa ka 62 anyos ang nakabsan sa kinabuhi.
Samtang, ang ihap sa aktibong kaso sa Covid 19 sa dakbayan anaa na sa 35 kini subay sa covid 19 tracker niadtong September 1, 2020. Kini ang dugang pamahayag ni Dra. Jett Oco.
Unom sa maong ihap ang anaa sa covid facilty sa Dr. Jorge Royeca Hospital, pito sa Buayan Isolation, tulo sa Isolation Facility, walo sa St. Elizabeth, Walo sa Doctors Hospital, usa sa MMC, usa sa SOCCSKSARGEN Hospital samtang usa ang anaa sa Isolation Facility sa kauluhan.
Samtang may kalabutan sa namatay sa Covid 19 nga taga Barangay Bula, gibutyag ni Dra. Oco nga walay history of travel ang nahisgutan ug na-expose kini sa iyahang anak nga nagpositbo sa covid nga maoy ilahang gibasehan sa contact tracing. Gilayon man usab nga gipa-cremate ang nahisgutang pasyente.
Samtang sa karon, adunay laing suspected death ang gina-imbestigahan sa city health office. Pag-angkon ni Dra. Oco nga hagit kanila sa karon tungod adunay uban nga nakasinati ug sakit apan nagadumili na magpa-check-up.
Kalabot niini, gibutyag ni Dra. Oco nga nakapahigayon na sila ug inisyal nga contact tracing sa mga nagpositbo nga gikan sa Gensan Fishport.
Subay sa datus, adunay usa ka 51 anyos nga babayeng taga Brgy. Apopong, adunay 46 anyos nga lalaki nga empleyado sa fishport nga taga Brgy. San Isidro, adunay 58 anyos nga taga Apopong, 41 anyos nga lalaki nga naga-trabaho sulod usa ka kompanya nga nahimutang sa Gensan Fishport nga kasamtangang anaa sa isolation facility sa kauluhan.
Aduna usab 58 anyos nga babaye nga taga Brgy. Apopong, 57 anyos nga taga Maasim nga naunang namatay niadtong Agosto 31, samtang 49 anyos nga fish vendor nga taga Surallah kung asa aduna kini upat nga natakdan ug ang 58 anyos nga lalaki nga taga Brgy Bula kung asa anaa sa walo ka tawo ang naktakdan niini sa virus.(LVR)
